Реал Мадрид стигна до нови три бода откако вчера славеше со убедливи 0:5 на гостувањето против Мајорка.
„Кралевите“ не само што не им дозволија на ривалите уште повеќе да ја зголемат разликата во бодови, туку и делуваа импресивно, како во нападот, така и во одбраната.
Без оглед на неколкуте отсуства поради повреди, избраниците на Жозе Мурињо прикажаа одлична колективна игра, којашто го красеше овој тим при освојувањето на ланската титула во Примера дивизион.
Гонзало Игуаин ја отвори серијата голови со прецизен волеј удар од петнаесетина метри, Аргентинецот нешто подоцна уште еднаш се запиша во листата на стрелци, два пати мрежата на Мајорка ја затресе и Кристијано Роналдо, а последниот гол беше дело на Каљехон.
Португалецот стигна до бројката од 11 постигнати погодоци сезонава, два помалку од водечкиот стрелец Лионел Меси. По оваа победа, Реал Мадрид сѐ уште заостанува огромни осум бода зад Барселона и Атлетико Мадрид, кои се наоѓаат на делба на првата позиција.
