Америка не знае што е модар патлиџан

Се јавува жена од Канзас во локалната редакција и тврди дека успеала да вкрсти домат и лубеница. Ги убедува дека создала „мистериозно овошје“, „хибрид“, а овие воодушевени праќаат екипа на лице-место за да известува за чудото што кај нас е познато како… модар патлиџан.

Репортажата се одвива како што претпоставувате: известувачот со фацијален израз што говори „никогаш немам видено ништо слично“ внимателно го разгледува плодот од сите агли, прашувајќи ја публиката што ли можело да биде.

Ај тоа, ама киксот на екипата од тв-вестите КАКЕ останува незабележан сè до моментот кога репортерот ја носи снимката кај локалниот хортикултурист, кој пак мошне грациозно истакнува дека веројатно се работи за млад/зелен модар патлиџан. Баш штета, зашто веќе му имаа смислено и име: „watermato“ или „tomelon“…