Јавното обвинителство денеска преку соопштение остро реагира на вчерашната прес-конференција на претседателот Стево Пендаровски околу случајот „Рекет“. Од Обвинителството се децидни дека не е време за напади на институциите и дека нема да дозволат дискредитирање на обвинители и мешање на политичарите во кривичните постапки. Од Обвинителството не се задоволни и од понудената „поддршка без задршка“ од страна на Пендаровски:
„Изјавата на претседателот на Република Северна Македонија дека дава целосна поддршка на обвинителството и дека ќе ги употреби сите уставни и законски овластувања за да го заштити од притисоци ќе беше реална, доколку повикаше пратениците да го изгласаат Законот за јавното обвинителство и доколку дадеше поддршка за зајакнување на капацитетите на обвинителството за поефикасна борба против криминалот и владеење на правото“, се вели во соопштението.
Притоа ЈОРСМ ја уверува јавноста дека за посочениот предмет, се постапува неселективно и навремено, според утврден план на истрагата и дека сите инволвирани во кривични дела ќе бидат сослушани или испитани и ќе одговараат согласно законот.
„Подлегнувањето на политички притисоци и мешање во работата на обвинителството, штетно влијае врз текот и успешноста на истражната постапка и врз обезбедување на доказите“, потенцираат во соопштението.
