Од следното лето возовите, трамваите и автобусите во Луксембург стануваат целосно бесплатни. Со тоа Луксембург ќе стане првата земја во светот со целосно бесплатен јавен превоз.
Иницијативата е предводена од реизбраната коалициска влада на Ксавиер Бетел, кој од средата го тера вториот премиерски мандат. Во кампањата, Бетел и неговата коалиција како свој приоритет ја поставија екологијата и заштитата на животната средина.
Луксембург Сити – главниот град на истоимената земја, страда од еден од најлошите сообраќајни застои во светот. Во градот живеат околу 110.000 жители, но над 400.000 секојдневно патуваат во градот на работа. Спроведената студија покажува дека во 2016-та возачите во Луксембург поминале, во просек, по 33 часа заглавени во сообраќајни застои.
Луксембург, како земја, има околу 600.000 жители, но уште 200.000 од Франција, Белгија и Германија секојдневно ја поминуваат границата за да стигнат на работа.
Луксембург веќе покажа прогресивен пристап кон јавниот транспорт. Минатото лето владата воведе бесплатен превоз за секое дете и лице помладо од 20 години, а за средношколците понуди бесплатен „шатл“ (директен) превоз од нивниот дом до образовната институција.
Во моментов патниците плаќаат по само 2 евра за патувања до два часа, што во земјата со површина од само 2.590 квадратни километри ги покрива речиси сите превозни потреби. Од 2020-та и тие цени ќе бидат повлечени, а дополнително ќе се заштеди на средствата кои досега се трошеа на наплата и контрола на продажбата на билети.
На владата ѝ преостанува само да доразмисли како ќе ги регулира патувањата во купеата од прва и втора класа во возовите.
