Фоторепортажа: Матка

Кањонот Матка е туристичко и излетничко место, недалеку од Скопје. Познат е по бројните цркви и манастири, прекрасните карпи и зеленилото што опкружува сѐ, како и пештерата Врело, во која до сега се измерени 212 метри длабочина… За оние што одамна не го посетиле, а и за тие што немаат можност да отидат, следува Матка низ серија фотографии.

Кањонот Матка е туристичко и излетничко место, недалеку од Скопје. Познат е по бројните цркви и манастири, прекрасните карпи и зеленилото што опкружува сѐ, како и пештерата Врело, во која до сега се измерени 212 метри длабочина… За оние што одамна не го посетиле, а и за тие што немаат можност да отидат, следува Матка низ серија фотографии.

Вообичаено, по пристигнувањето во Матка, луѓето седнуваат на кафе во ресторанот, кој во меѓувреме се претворил во неколку ресторани.

Во моментов главна атракција е возењето со кајче спроти текот на реката, до пештерата Врело. Возењето трае 10-15 минути, во зависност од расположението на водичот што ве вози. Ова задоволство ќе ве чини 300 денари и за да тргнете, мора да имате група од најмалку четворица. Доколку немате, ќе мора да почекате уште некој што оди натаму.

По уживањето во пејзажите зачинети со удирањето на брановите во дрвото од чамецот, доаѓате до скалите кои водат до пештерата Врело. По 30-40 скалила, ќе се најдете пред влезот на пештерата, каде што ќе ве пречека неподносливата бучава на генераторот и мирисот на дизел горивото. Но, веднаш потоа се упатувате надолу по вторите скали и влегувате во студенилото на Врело.

Атмосферата што ќе ве пречека во пештерата е како создадена од умот на некој што пишува сценарија за хорор филмови. Од таванот постојано паѓаат големи и студени капки вода, вклучени се два рефлектори што осветлуваат агли од пештерата и создаваат чуден отсјај, има две езерца (помало и поголемо), постојано цврцорење на лилјаците кои живеат во пештерата – сѐ на сѐ прекрасно.

Врело е млада пештера, т.е. сѐ уште е во фаза на формирање, па капките вода напластуваат нови слоеви минерали на неверојатните камени формации, како „шишарката“ на сликата погоре, која расте по еден милиметар секоја година. Откако ќе ви ја соопшти таа информација, водичот излегува надвор на цигара и ве остава сами со изолираната група, длабоко во пештерата…

За среќа, во вистинскиот свет не се случува напад од вонземјани или отсекување од светот со одрон од камења, по што ќе започне некоја голема авантура. За жал, водичот ви остава премалку време за разгледување и фотографирање…

Комбинацијата од придушено природно светло и силниот отсјај од рефлекторите создаваат магично испреплетување на боите насекаде по ѕидовите од пештерата, но нив ќе ги забележите на фотографиите – со голо око ќе видите многу малку. Но, водичот почнува да вика дека вие сте добиле повеќе време од сите останати…

…и вие морате да заминете и зад себе да ја оставите убавината на пештерата.

На заминување ќе ви го покажат и местото каде што од надворешниот влез на пештерата, на длабочина од 6 метри, започнуваат нуркачките експедиции што ги истражуваат подводните краци на Врело. Оваа година истражувањата потврдија најмалку 212 метри длабочина, но и два нови краци, кои ќе бидат дополнително истражени.

И ние успеавме да уловиме двојно виножито, но не нѐ интересира што значи.

При враќањето со чамецот кон појдовната точка одново можете да уживате во пејзажите…

На северната страна од манастирската црква Св. Андреа што се наоѓа во комплексот на Матка, има еден отпечаток од рака, за кој се вели дека е направен кога Крали Марко ја допрел црквата. Марко многупати се споменува во повеќе легенди поврзани со Матка, како на пр. онаа за Марков Камен, кој се наоѓа на највисокиот врв над кањонот и во кој има една огромна дупка, небаре издлабена рачно.

Но, најинтересно за отпечатокот од раката е тоа што…

…се вели дека оној чија рака ќе се совпадне со калапот, ќе биде достоен да пишува за вас. Токму затоа сите наши автори прво поминуваат низ оваа проверка.

На крајот, останува само уште едно предупредување. Доколку можете да го избегнете викендот и да ја посетите Матка во работен ден, тоа би било најдобрата можна опција за избегнување на гужвите. Но, доколку одите за време на викенд, потрудете се тоа да биде што е можно порано. Веќе околу 12 часот движењето пеш беше отежнато, возењето велосипед тешко, а влегувањето и паркирањето автомобили невозможно; поради километарската колона.