„Сосема обично“ е насловот на изложбата на уметникот Владимир Илиевски, отворена во галеријата „Метаноја“ во Скопје. Делата на Илиевски ќе бидат изложени во галеријата еден месец.
– Светлината е најобична природна појава. Таа е толкав дел од нашето искуство така што забораваме дека не само што можеме самата неа да ја видиме, туку и заради неа гледаме сѐ друго. Како што псалмистот вели, „Во Твојата светлина гледаме светлина“ (Псалм 36:9). Владимир Илиевски во сликата „Создавање на светлоста“ ги има вткаено своите теоретски знаења, сликарски вештини, креативност, контемплативност и интертекстуалност во совршен спој – вели кураторот Коста Милков.
„Создавање на светлоста“ го сумира целиот опус од оваа збирка на дела посветени на природата. Контрастот меѓу делот на сликата во сенка и онаму каде што е облеан во светлина е класичен пример за уметничка композиција, додава тој.
-Набљудувачот добива впечаток дека е дел од сцената, дека се наоѓа во честакот со вегетација и е „фатен“ во мигот кога ја забележува светлината која се пробива низ крошните. Тука на ова темно место и под закрилата на древните дрвја светлината се прикажува во сета своја автентичност – вели Смилков.
Владимир Илиевски е роден во 1989 година во Скопје. Во 2012 г. дипломирал на Факултетот за ликовни уметности во Скопје на Катедрата за сликарство. Од 2012 до 2023 г. реализирал петнаесет самостојни изложби во: Скопје, Битола, Охрид, Делчево, Струмица, Ботевград (Р. Бугарија) и Нови Сад (Р. Србија). Учествувал на повеќе групни изложби во земјава и странство. Автор е и на два мурали, во Скопје и во Струмица. Учествувал на десетина ликовни колонии во: Охрид, Струга, Струмица, Велес, БиХ, Бугарија, Србија. Добитник е на 7 национални награди.
Од 2012 г. член е на ДЛУМ, а од 2022 член е и на ДЛУБ.
