Холандија денес, по 120 години со жена на тронот, доби крал – Вилем Александар застана на тронот по повлекувањето на кралицата Беатрикс.
По тој повод целата земја се обои во портокалово, бојата на кралското семејство.
Кралицата Беатрикс (75) денес абдицираше, предавајќи ја круната на својот најстар син, Вилем Александар (46) кој стана прв крал на Холандија по повеќе од еден век. Кралицата беше на престолот 33 години во текот на кои, според мислењето на нејзините поборници, го трансформираше кралството во модерна монархија.
Со ова Беатрикс се врати на својата претходна титула – принцеза. Чинот на абдицирање го потпишаа Беатрикс, новиот крал како и членовите на холандската влада, меѓу кои и премиерот Марк Рут.
На плоштадот во Амстердам, Дам, уште од раните утрински часови се собраа илјадници луѓе во очекување да го поздрават новиот крал и неговата сопруга, кралицата Максима.
Вилем Александар ќе биде крунисан во катедрала во центарот на Амстердам. Новата кралска двојка има три ќерки, принцезите Катарина Амалија (9), Алексија (7) и Аријана (5). Негова наследничка сега е најстарата ќерка Катарина Амалија.
Кралицата Беатрикс ќе остане запаметена по тежнеењето кон перфекција, беспрекорната облека и богатата колекција на шешири.
