Конзумирајте повеќе вода!
Знам дека ова е веќе клише реченица која се појавува во секој весник, секоја статија, дневно по 10 пати на тв, секој доктор го препорачува тоа, но многу ретко ги слушаме вистинските причини зашто е тоа потребно, особено за оние кои сакаат да изградат мускулна маса,да намалат телесни масти и да бидат генерално здрави.
Она што ни е помалку познато е дека нашето тело губи од 1,5 до 2 литри вода дневно преку кожата, белите дробови, бубрезите, цревата; невклучувајќи ја физичката активност – која што може двојно или тројно да го зголеми исфрлувањето на вода! Неопходно е да се конзумира најмалку 2-3 литри во денот, само поради нормално функционирање на телото. За жал, најголем дел од нас конзумираат не повеќе од 2-3 чаши вода, што е екстремно малку.
Водата е потребна за сите сложени метаболички хемиски процеси во телото кои што телото ги изведува секојдневно – како што се производство на енергија, регенерирање и градење на мускулна маса, топење на телесни масти, исфрлање на токсини итн. Недостиг на вода ќе ги прекине/успори сите овие процеси. Ако чувствувате дека имате ниски нивоа на енергија, голема е шансата дека внесувате премалку вода. Исто така, благата дехидратација доведува до намалена концентрација.
Дури над 65% од нашата телесна композиција е составена од вода! Додека од целата маса на мускулите, 73% е вода! За оние кои тренираат интензивно во теретаната, или независно кој спорт, губат течности во огромна мера преку потењето. Доколку таа вода не се надокнадува, многу е лесно телото да се доведе до дехидратација, што може да доведе до значително намалување на перформансите за време на физичката активност.
Водата исто така помага за целосна детоксикација на телото (исфрлање на сите штетни материи кои се создаваат при многу процеси), помага за подмачкување на зголобовите и значително го забрзува метаболизмот.
Водата е поважна од колку што мислите и е нешто кое е неопходно за сите оние кои сакаат качат мускулна маса или да топат масти! Конзумирајте барем 4-5 литри вода во денот и на добар пат сте да ја достигнете вашата цел!
