На 24 јули 1911 година, американскиот истражувач Хирам Бингам го открил древниот град на инките кој 400 години лежел напуштен. Истиот тој претставува едно од 7-те чуда на новиот свет.
На денешен ден пред 102 години бил откриен светиот град Мачу Пикчу кој се наоѓа на 2430 метри надморска височина на Андите во Перу. Тој денес останува како богато наследство и сведоштво за врвот на развојот на Инките, а доказ за тоа се и каналите за наводнување, поплочените храмови и камени градби.
Се верува дека Инките започнале да го градат во 1300 година, но бил напуштен во официјална смисла од страна на владетелите на Инките еден век подоцна. Многумина веруваат дека главната причина за ова не е покорувањето од страна на Шпанците, туку епидемијата на сифилис коај во тие краеви пристигнала од Европа, а потоа и граѓанската војна.
Мачу Пикчу во 1981 година бил прогласен за Перуанско историско светилиште и во 1983 година бил вклучен во Светското наследство на УНЕСКО. Бидејќи не бил воопшто уништен од Шпанците, Мачу Пикчу има доста голема историска, археолошка и културна важност и се смета за свето место. Мачу Пикчу бил изграден во класичен Инка стил, со полирани камени ѕидови.
Главни градби во локалитетот се Интихуатана, Храмот на сонцето и Собата на три прозорци. Овие три градби се наоѓаат во делот кој археолозите го нарекуваат „свет округ“ на Мачу Пикчу. Во септември 2007 година, Перу и Универзитетот Јејл се договориле да се пренесат сите артфакти во Перу кои биле пренесени за време на американската експедиција на чело со Бингам.
Доколку сакате да направите виртуелна прошетка по ова неверојатно место, кликнете тука.
