Он-лајн библиотека Македоника ја одбележа годишнината од своето постоење со лансирањето на новиот дизајн на веб-страната www.makedonika.mk
Комплетниот редизајн, како и новите функционалности, ја вбројуваат оваа дигитална библиотека во светскиот врв на електронското издаваштво. Новиот и интуитивен начин на пребарување и читање ја прави оваа платформа единствена во светот на е-книгите.
Денес на полиците на оваа александриска библиотека на македонската книжевност има 450 книги до кои имаат пристап преку 32.000 регистрирани читатели. Да напоменеме дека регистрацијата е бесплатна, мобилната апликација е бесплатна, книгите се бесплатни. Ова придонесе Македонците да ”симнат” преку 120.000 книги за првите 365 дена.
Најчитани наслови се модерните текстови на новите интернет ѕвезди, лектирите, нашите класици и книгите со историска содржина. Посебно е интересен податокот дека 50% од читателите не се од Скопје, ако се има предвид дека надвор од главниот град нема повеќе од 5 книжарници.
Евидентен раст се заблежува и кај бројот на регистрирани корисници од нашето малцинство во соседните држави кои само на овој начин можат да дојдат во контакт со литература на нивниот мајчин јазик.
