Вредноста на акциите на компанијата Gilead Sciences денеска на берзата порасна за 4%, откако компанијата ја соопшти цената по која ќе го продава својот лек ремдесивир – кој се покажа ветувачки ефективен во третманот на Ковид-19.
Како што соопшти извршниот директор Даниел О’деј, цената ќе зависи од купувачот и колку долго пациентот ќе го зема лекот. Имено, на американската влада и другите развиени земји, компанијата ќе им наплаќа по 390 долари за една доза ремдесивир, односно 2.340 долари за петдневен третман со шест дози од лекот – колку што се проценува дека ќе им биде потребно на најголемиот дел од пациентите.
О’Деј истакна дека цената е далеку пониска од вистинската вредност и дека на тоа се одлучиле бидејќи сметале дека тоа е правилната постапка во време на пандемија:
„Додека светот продолжува да се бори со човечкиот, социјалниот и економскиот импакт од оваа пандемија, веруваме дека одредување на цената на ремдесивир далеку под вредноста е вистинскиот и одговорен чекор“, се вели во соопштението од компанијата.
Од Gilead Sciences велат дека делумна причина за одлуката да се одреди фиксна цена е да се елиминира потребата од преговори со секоја земја посебно. Наведената цена ќе биде понудена „на сите влади во развиените земји ширум светот, каде ремдесивир е дозволен за употреба“, рекоа од компанијата.
На приватните американски компании за осигурување, компанијата ќе им го продава лекот по цена од 520 долари по доза, односно 3.120 долари за петдневен третман. Логиката е дека лекот би можел да им заштеди на болниците до 12.000 долари по пациент, поради тоа што излекуваните порано ќе бидат пуштени од болница.
Европската агенција за лекови (ЕМА) на 25 јуни условно ја одобри употребата на антивирусниот лек, откако се покажа како ветувачки лек во клиничките испитувања, со што ремдесивир стана првиот лек кој добил препорака во Европа.
Условното зелено светло значи дека лекарите ќе можат да препишат ремдесивир (продажно бренд име му е Veklury) кога ќе биде одобрен од Европската комисија, а ќе може да се продава кога ќе бидат достапни сите податоци за дејството на лекот и неговите несакани ефекти.
Американската Агенција за храна и лекови (FDA) го одобри за употреба во итни случаи во мај, а оттогаш компанијата ја донираше својата залиха за дистрибуција низ САД. Лекот ќе почне да го наплаќа во јули.
