Давид Писонеро, стратегот на Вардар, по триумфот над Монпелје во Лигата на шампионите, истакна дека овој тим иако имал едно лошо полувреме во одбраната, сепак, со одлично второ полувреме и голема битка, дошол до полн плен на гостувањето во Франција.
„Одигравме еден тежок меч. Во првиот дел одбраната не беше на ниво, да примиш 17 гола не е малку. Нападот беше во ред, затоа што дадовме 16 гола. А, во вториот дел се подобривме и успеавме да дојдеме до посакуваната победа. Имавме и неколку голови преку брзи контри, задоволни сме од резултатот, затоа што не е лесно да победиш на овој терен. Освоивме една тешка битка“, изјави Писонеро.
Вардар и лани ја започна сезоната на сличен начин, со победа над Монпелје на гостински терен, што воедно беше и најава за европската титула која подоцна се освои во Келн. Следен предизвик за „црвено-црните“ ќе биде дуел со Порто во СЦ „Јане Сандански“, на 22 септември.