Новата книга на досега невидени фотографии од Ејми Вајнхаус содржи моменти од 2003 година, во времето кога таа работела на објавувањето на својот прв албум Френк. Книгата е во процес на производството, а се финансира со помош на кампањата Kickstarter. Фотографот Чарлс Мориати овековечи искрена слика од Ејми Вајнхаус во светло-црвена маичка додека го шета кучето во мрачна атмосфера, и сликата беше избрана за насловната страница на гореспоменатиот албум. Книгата, која наскоро ќе се појави, со наслов Before Frank, се состои од интимни снимки направени за време на тој период.
Ејми и Чарлс се спријателија на едно од снимањата, а портретите покажуваат една среќна, опуштена и здрава Ејми, и се контраст на многубројните депресивни фотографии кои се појавија во различни таблоиди во текот на последните години од нејзиниот живот.
Вајс Њуз разговараше со Чарлс за неговата соработка со Ејми и за одговорноста што тој ја чувствува кон зачувување на спомените на една драга пријателка.
Фотографиите се навистина убави и се вистински потсетник на среќните времиња на Ејми. Зошто чекаше тринаесет години за да ги објавиш?
Едноставно не чувствував дека е момент за тоа. Го гледав филмот на Асиф Кападија минатата година и тогаш се ослободив од таа темна, длабока тага што ја чувствував и сакв да споделам со луѓето некои посреќни моменти. Мислам дека тоа е неверојатен и одличен документарец, но книгата „Пред Френк“ е нешто сосема друго и ја покажува Ејми весела и во нова светлина. За мене таа е споделување на спомени кои долго време ги чував. Мислам дека е време тие да се откијат. Бевме деца кога беа направени фотографиите, Ејми имаше само дваесет години, тоа навистина беа забавни и среќни времиња.
Зошто се одлучи оваа книга да ја објавиш сам, без издавач? Секако постојат еден куп издавачки куќи кои би биле заинтерсирани?
Долго време размислував за тоа. Најмногу ме кочеше помислата дека можам да ја загубам контролата. Не сакав заработувачката, профитот да бидат граница за да направам нешто различно од она што го сакам. Така, кога тоа ќе го направам сам, можам да бидам апсолутно сигурен дека ќе создадам нешто необично и посебно.
Дали си направил многу слики за време на снимањето? Ова е само мал дел од нив?
Не. Имав многу среќа што Ејми беше толку впечатлива и опуштена за време на снимањето, па направивме неколку феноменални фотографии без многу чкрапање. Сакам денес да ги гледам не како одделни слики, туку како една сеопфатна приказна. Фотографиите толку убаво се сложуваат една врз друга и се изразени топли емоции поради што толку многу ги сакам.
Дали имаш накаков посебен спомен од тоа снимање?
Постои фотографија на Ејми во маичка со ликот на Патрик Свејзи, и во рацете ја држи својата Gibson електрична гитара. Ја фотографирав во литот на Риц кулата во Њујорк, и додека работевме портирите постојано го повикуваа лифтот за да не спушти долу. За нас тоа беше многу смешно. Неверојатни 24 часа. Првин планиравме да снимаме некаде надвор, но неколку часа пред снимањето започна страшно невреме со громови, па ја сменивме локацијата. Сите тие одлични фотографии ќе ги немаше денес доколку не се случеше невремето.
Кога книгата ќе се најде во продажба?
Во моментов уште работам на дизајнот на книгата. Се надевам дека ќе се најде во продажба околу почетокот на август.
