Гостин во емисијата „Претрес со Ландов” е началникот на Секторот за внатрешни работи Скопје, Сашо Топаловски. Тој детално објаснува за проектот „Безбеден град”, кој во понеделникот започна со пробна работа. Според неговите податоци, само за два дена забележани се 110.000 прекршувања на законите. Локациите на кои се поставени камерите се внимателно одбрани, бидејќи статистиката покажува дека тука се случуваат најмногу прекршувања на сообраќајните правила.
„Целта на оваа иницијатива е заштита на граѓаните и поттикнување на безбедно возење, а не само казнување. Апелирам до сите возачи да возат внимателно”, истакнува Топаловски. Министерството за внатрешни работи е задоволно, бидејќи веднаш по започнувањето на системот, возачите покажуваат повисока свест за безбедноста во сообраќајот.
Следните прекршувања кои ќе се мерат се: неправилно престројување, пречекорување на дозволената брзина, недозволено возење и непропуштање на пешаци. Планирано е и следење на користење мобилен телефон за време на возење и носење заштитен појас. СМС известувањето за сторени прекршувања стигнува до возачот во рок од 5 минути. Возачот има 7 дена за да потврди дали прифаќа дека направил прекршок. Доколку не сте управувале со возилото, а сте сопственик, треба да ја известите полицијата за тоа кој управувал со возилото, кажува Топаловски.
Тој апелира за стрпење во спроведувањето на системот, истакнувајќи дека исклучоците и слабостите ќе бидат успешно решени. Системот за мерење на брзината е усогласен со европските стандарди.
