Учесници во проектот се дизајнери од различни земји: Ане Шарлинг Тофт (Данска / Норвешка), Ана Рингстад (Норвешка), Јустина Семченкаите (Литванија), Тува Самуелсон (Шведска), Мико Пелтонен и Билел Сехли од HÄN (Финска), како и македонските дизајнери Андреа Атанасова, Ивона Мицановска, Ева Давкова, Марија Роглева и Солза Поповска. Ментор на резиденцијата е Ирина Тошева.
Проектот е организиран од Амбасадата на Шведска во Македонија, во соработка со Канцеларијата на Амбасадата на Литванија, како и Амбасадите на Данска, Финска и Норвешка во Србија, поддржано од Нордискиот совет на министри и Македонското модно здружение.
„Со задоволство ја инициравме оваа иницијатива која ги поврзува младите креативци од Нордиските, Балтичките и Балканските земји, со цел да подготвиме промени за поголема одржливост во модната индустрија. Модните дизајнери секогаш биле на предната линија на иновациите и инспирацијата за идните генерации. Со оваа иницијатива, сакаме да покажеме дека одржливоста и ‘зелените’ практики се современи и насочени кон иднината“, изјави Ола Сулстром, амбасадор на Шведска во Македонија.
Проектот е осмислен како интензивна интеркултурна програма, која комбинира онлајн подготовка со деветдневен престој во Македонија. Учесниците ќе истражуваат одржливи модни практики базирани на еколошка одговорност, културно наследство, занаетчиство и современ дизајн преку заеднички истражувања и креација.
Програмата вклучува патување низ Македонија, каде дизајнерите ќе се поврзат со локални занаетчии и традиционални техники на изработка. Исто така, предвидени се едукативни работилници во локални училишта за поттикнување на свеста за одржливост и креативна одговорност кај младите.
На крајот од резиденцијата, учесниците ќе создадат капсулна колекција и селектирани уметнички објекти, развиени преку соработка помеѓу нордиско-балтичките и македонските дизајнери. Финалните дела ќе бидат презентирани на изложба во рамките на Моден Викенд Скопје, кој ќе се одржи од 27 до 29 март, покажувајќи го трансформативниот потенцијал на одржливата и прекугранична соработка.
„Сметаме дека иднината на модата се создава преку соработка, храброст и одговорност. Оваа резиденција не е само креативен собир, туку и место каде што различни култури, идеи и вредности се спојуваат за да создадат нова, поодржлива модна приказна за регионот и Европа“, изјави Светлана Богова Јовановска, претставник на Македонското модно здружение.
Со оваа иницијатива, резиденцијата има за цел да инспирира и охрабри нова генерација на дизајнери од Западен Балкан активно да учествуваат во создавањето на поодговорна и позелена модна индустрија, втемелена во културниот идентитет и зајакната преку меѓународна соработка.
