Државниот санитарен и здравствен инспекторат (ДСЗИ) донесе одлука да ја затвори кујната во основното училиште „Димо Хаџи Димов“ во скопската населба Влае, поради пријави од повеќе ученици кои се жалеле на интензивни стомачни болки. Инспекторатот веднаш дејствуваше, наредувајќи вонредно чистење, здравствени прегледи за вработените и земање мостри од работните површини, со цел да се утврди точниот извор на проблемот.
Директорот на ДСЗИ, Кирил Лазов, потврди дека кујната е затворена како потенцијален изложен ризик и издаде решение за забрана за работа. Со оваа одлука следува вонредна дезинфекција, дезинсекција, дератизација и спроведување на здравствено-хигиенски мерки од овластена институција.
Меѓу учениците кои се пожалиле на симптоми е и помладиот син на премиерот Христијан Мицкоски, Антониј. Според информации објавени во медиумите, детето било хоспитализирано, но по добиената медицинска помош е испратено на домашно лекување.
Портпаролката на Владата, Душица Митева, ја потврди оваа информација и изрази желби за брзо закрепнување на сите ученици кои биле погодени од труењето. „Им посакуваме на сите деца што побрзо оздравување и безбедно враќање во училиштето“, изјави Митева.
Инспекциските служби продолжуваат со проверките, а резултатите од земените мостри ќе покажат дали кујната навистина е извор на труењето.
