Македонија во нова ера на санкции во сообраќајот
Со последната одлука на пратениците, Македонија навлезе во нова ера на санкции во сообраќајот. Клучните закони, усвоени кон средината на декември, ќе осигураат целосна функционалност на системот „Безбеден град“, кој ќе биде активен од 1 февруари. Новите правила предвидуваат значително построги санкции за опасно возење, воведување на систем на негативни поени, автоматизација на комуникацијата со возачите, како и зголемување на обврските за сопствениците на возила и автошколите.
Сите сообраќајни прекршоци забележани со камери ќе бидат документирани и возачите ќе добиваат СМС пораки и електронски пошти со записник и фотографии од прекршоците. Казната ќе може да се намали за 50% ако се плати во рок од осум дена. Исто така, сопствениците на возила се должни во рок од три дена да пријават било каква промена на телефонскиот број или имејл на станица за технички преглед. Во случај на непочитување, предвидена е глоба од 100 евра, а санкции ќе имаат и фирмите.
Од 1 февруари, доколку возач во период од четири години трипати добие правосилна забрана за управување со возило од иста категорија, судот задолжително ќе ја одземе неговата возачка дозвола. Тој нема да може повторно да полага за најмалку една година, а информацијата ќе биде евидентирана на граничните премини. Ова важи и за странците со странска дозвола, кои на територијата на Македонија не ќе смеат да возат.
Предложените измени на законите донесуваат и построги правила за возење под дејство на дрога и алкохол над 1,5 промили, како и за возење во спротивна насока и значително пречекорување на брзината. За овие прекршоци предвидени се затворски казни од 3 месеци до 3 години, со можност за дополнителни парични казни. Судот, во случаи на тешки дела и повторени прекршоци, може да одземе и самото возило, особено ако сторителот веќе бил осудуван за сообраќајни кривични дела.
