Возење по највозбудливиот пат во Норвешка

Atlantic Ocean Road не е долг – само 8.3 километри, но ова парче норвешки пат има репутација на најопасниот во Норвешка.

Изграден во 1980-тите, Атлантик Оушн Роуд и неговите благо речено возбудливи 8 мостови, неколку брани и надвозници, достигнаа статус на една од најпопуларните туристички атракции во земјата.

Атлантик Оушн Роуд поврзува „ланец“ од норвешки острови, поточно островите на архипелагот Еиде, и притоа изгледа како да го „задушува“ морето. За време на конструкцијата на патот, проектот се соочил со 12 силни бури – како на морето да не му се допаднала идејата да поминува пат низ неговиот простор.

Сепак, човек како човек – нема да отстапи пред природата, па веќе во 1989-та патот бил отворен за патниците. Патем, првично бил замислен како железничка пруга, но заради комплексноста на поставувањето на пруга во таквите услови и терен, одлучено е дека автопат ќе биде подобрата варијанта.

Атлантик Оушн Роуд, кој во многу нешта потсетува на ролеркостер, на почетокот бил пат со патарини. Но во меѓувреме самиот се има исплатено, па денес врие од илјадници мотористи и мотоциклисти кои ја возат рутава не затоа што мораат, туку за да ги доживеат адреналинските кривини, твистови и извонредните глетки.

Кога времето е убаво, можете да забележите китови и фоки, но за многумина, особено за фотографите, Атлантик Оушн Роуд е најпривлечен кога има (блага) бура и морето збеснува.

Норвешка го има прогласено за официјално културно наследство, и за „национална туристичка рута“. Сепак, најголемото признание Атлантик Оушн Роуд доби кога беше прогласен за „норвешка конструкција на векот“.