Потпишан меморандум за културна соработка во Загреб
Вчера, во македонскиот Културно-информативен центар во Загреб, беше потпишан важен меморандум за културна соработка помеѓу Музејот за уметност и занаети од Загреб и Националната галерија на Република Македонија од Скопје. Договорот го потпишаа директорот на загребскиот музеј, Сањин Михелиќ, и директорот на Националната галерија, Али Синани, заедно со програмскиот раководител и виш кустос, Маја Крстевска.
Меморандумот произлезе од успешното партнерство и заедничките проекти реализирани помеѓу двата института, со што дополнително се зајакнуваат културните врски помеѓу Македонија и Хрватска.
Директорката на македонскиот КИЦ во Загреб, Мими Ѓоргоска Илиевска, изјави: „Потпишувањето на овој меморандум е значаен чекор за развој на културната соработка помеѓу нашите две земји. Македонскиот КИЦ игра клучна улога во поттикнувањето на соработката помеѓу македонските и хрватските институции, во интерес на афирмацијата на нашите културни вредности.“
Целта на меморандумот е зајакнување на меѓународната соработка преку промоција на уметничкото и културното наследство на двете земји, а исто така и развој на индивидуални и заеднички програми. Ова ќе ги зголеми капацитетите на двете институции, поврзувајќи ги нивните обемни фондови, од историски колекции до современа уметност и занаетчиство.
Али Синани, директор на Националната галерија, нагласи: „Верувам дека овој меморандум ќе овозможи размена на знаења и искуства, како и отворање нови можности за соработка меѓу културните работници и уметниците од Македонија и Хрватска.“
Сањин Михелиќ, директор на загребскиот музеј, изјави: „Со задоволство очекуваме две значајни изложби во Македонија оваа година, со што ќе ја претвориме нашата соработка во конкретни културни акции достапни за публиката во двете земји.“
Отворената соработка со Музејот за уметност и занаети ќе се конкретизира преку низа проекти, од кои два се планирани за октомври и ноември: „Менче Спировска: визуелни фасцинации на Загреб“ во галерискиот простор Мала станица на Националната галерија во Скопје и „Арсовски – фотографи“ во Музејот на град Скопје. Овие изложби беа претходно прикажани пред хрватската публика во македонскиот КИЦ.
Маја Крстевска, виш кустос и програмски раководител, заклучи: „Оваа иницијатива потврдува важноста на меѓународната соработка на културните институции и придонесува за развој на поквалитетни и поразновидни културни содржини достапни за пошироката јавност.“
