Новото вино е плод на директната соработка помеѓу италијанскиот новинар и вински експерт, Марко Поцали, и режисерот Милчо Манчевски. Тоа е дел од концептот „Јажето на 41. паралела“, кој симболично поврзува различни култури и простори, особено Истокот и Западот, како Скопје и јужна Италија. Виното се произведува од 100% сортата аглијанико, на падините на вулканот Везув, во близина на Неапол, од органски одгледувани лозја.
Реномираниот италијански новинар и експерт за вино, Марко Поцали, го најави новото авторско вино „Пред дождот“, инспирирано од македонскиот и светскиот филмски класик на Милчо Манчевски.
Производството е ограничено и виното е направено од 100% аглијанико, на вулканска почва, која му дава посебен карактер и идентитет.
Ова вино е посветено на култниот филм „Пред дождот“, кој освои „Златен лав“ и уште девет награди на Филмскиот фестивал во Венеција во 1994 година. Тој беше признат во Италија како филм на годината и е вклучен во училишната филмска програма, а исто така е првата македонска номинација за „Оскар“ во 1995 година.
– Филмот „Пред дождот“ ме следи од 1994 година и остави силен впечаток врз мене. Неговата убавина и порака, за времето што никогаш не чека, трајат во мојот живот – изјави Поцали, нагласувајќи дека проектот е замислен како авторска соработка, а не комерцијален производ, што ги поврзува виното, времето и просторот.
Ова вино е резултат на непосредната соработка помеѓу Поцали и Манчевски и е составен дел од концептот „Јажето на 41. паралела“. Тоа е патување што започнува од јапонскиот остров Хоншу, поминува низ Азија и Медитеранот, со значајна станица во Скопје, родниот град на Манчевски, и завршува во Неапол, под Везув.
– Целта беше да создадеме линија што обединува. Виното е дел од тоа патување. Старата неаполска лозја привлекуваат мириси од морето и минералниот карактер на вулканската почва, создавајќи винско грозје со уникатен идентитет – додава Поцали.
Според Поцали, креативноста на Милчо Манчевски е незаменлива во оваа приказна. Тој го интерпретира виното преку фотографија, при што етикетите ќе се менуваат секоја година со негови фотографии и кратки текстови. За првата берба е избрана фотографијата „Гинко“ (2011), која Манчевски ја опишува: „Ливче фатено во вода, водата фатена во метален квадрат, квадратот фатен во бетон. Суштината на природата опстојува, како во чаша вино“.
Ова е петто вино „Пред дождот“ на Поцали. Првото беше произведено во 2009 година на Етна, Сицилија, во соработка со производителот Салво Фоти, една од најзначајните личности во италијанското винарство. Во периодот од 2009 до 2015 година, следеа нови вина, вклучувајќи второ направено во словенечкиот Карст и трето во Тоскана, со познатиот винопроизводител Роберто Чипресо.
Најновото вино во моментов одлежава во шише и ќе биде претставено во специјална прилика.
– Ова вино е создадено за споделување и не е наменето за масовниот пазар. Проектот „Пред дождот“ останува отворен за нови берби, но со истиот принцип: ограничено производство, јасен авторски печат и длабока врска помеѓу виното, времето и местото на неговото создавање – заклучува Поцали.
