Градот Виена ќе затвори неколку музеи посветени на значајни композитори оваа година, како резултат на мерките за штедење и намалување на буџетот за култура, со цел да се исполнат поставените цели за јавната потрошувачка, соопштија градските власти.
Според директорот на музеите во Виена, домот каде што починал австрискиот композитор Франц Шуберт, резиденцијата на Јохан Штраус, како и куќата на Јозеф Хајдн ќе бидат привремено затворени.
Овие мерки се дел од поширок план за штедење, кој вклучува и значајно зголемување на цените на јавниот превоз во австриската престолнина, дури и до 30 проценти за некои видови билети.
„Сите ние мора да се прилагодиме и да штедиме. Ова е реалноста во која живееме“, изјави Матијас Бунцл, директор на јавната установа „Музеи Виена“, која управува со неколку историски објекти во градот.
Виена, под управата на династијата Хабсбург, стана еден од најзначајните културни центри во Европа во периодот на барокот и на крајот на 19-тиот век, културен дом на значајни уметници како Моцарт и Бетовен, но и на сликарите Густав Климт и Егон Шиле.
Иако музеите кои ќе бидат затворени се помали објекти со ограничени трошоци за персонал, затворањето проценето на две години, според директорката за финансии Кристина Шварц.
Буџетот за градските музеи е намален од 29,7 милиони евра во 2025 година на 28,4 милиони евра годинава, а планирани се дополнителни намалувања за 2027 година.
Станот каде што починал Шуберт е затворен од почетокот на годината, додека куќата на Хајдн и резиденцијата на Штраус ќе затворат на 2 март.
Родниот дом на Шуберт исто така ќе биде затворен од истиот датум поради реновирање и се очекува повторното отворање во 2028 година, на 200-годишнината од неговата смрт.
Дополнително, неколку други музеи во Виена ќе го намалат своето работно време, вклучувајќи го Музејот Пратер, Вилата Хермес, црквата Ото Вагнер, Дворскиот павилјон Ото Вагнер во Хицинг и Павилјонот Ото Вагнер на Карлсплац.
