Затворениот венецуелски претседател Николас Мадуро и неговата сопруга Силија Флорес денеска официјално пристигнаа на американско тло, откако авионот со кој беа транспортирани слета во воената база Stewart Air National Guard Base во Њујорк. Според информации објавени од Си-Ен-Ен, повикувајќи се на федерални функционери, Мадуро по излегувањето од авионот бил облечен во сива гардероба и со лисици на рацете, а го придружувале повеќе од десет агенти облечени во црно. Снимките од телевизијата WCBS прикажуваат строго обезбедено движење од авионот до објектите на базата, во целосна отсутност на цивили.
Пред самото симнување од авионот, американските власти ја започнаа процедурата за службено приведување на Мадуро и Флорес. Како што изјави безбедносниот аналитичар на Си-Ен-Ен, Џон Милер, на двајцата им биле земени биометриски податоци, отпечатоци од прсти и служебни фотографии, по што нивните информации биле внесени во системот на американската Царинска и гранична заштита.
По завршувањето на административниот процес, тие мора да поминат и задолжителни лекарски прегледи пред да бидат префрлени во Metropolitan Detention Center, каде повторно ќе бидат евидентирани пред судска расправa, која според најавите би можела да се одржи во понеделник. Според извори од безбедноста, Флорес во моментот на објавувањето сè уште престојувала во хангарот на базата, каде што минувала дополнителни медицински проверки.
Во притворскиот центар, Мадуро и неговата сопруга ќе бидат поставени под посебен административен режим со највисоко ниво на безбедност, со можност за изолација и целосно раздвојување. Американските власти проценуваат дека станува збор за лица со висок безбедносен ризик, предвидувајќи ги обвиненијата за организиран криминал, трговија со дрога и перење пари против Мадуро.
Според анализата на Милер, овој притвор би бил драстичен пресврт во животот на поранешниот венецуелски лидер, кој со години живеел во луксуз под јако обезбедување и со пристап до значителни финансиски средства, кои американската влада тврди дека се стекнати преку соработка со нарко-картели. Сега, тој ќе се соочува со суровата реалност на федералниот притворски систем, кој долго време е предмет на критики за лоши услови и недостаток на здравствена грижа. „За Николас Мадуро, ова ќе биде вистински шок за организмот,“ заклучува Милер, додавајќи дека преминот од претседателска палата во притворска ќелија претставува пресврт без преседан во неговата политичка и лична историја.
