Словенечкиот кошаркар Лука Дончиќ беше клучен играч во победата на Лос Анџелес Лејкерс над Њу Орлеанс Пеликанс со резултат 133:121. Дончиќ постигна импресивни 34 поени, од кои дури 20 во првата четвртина, а на својот настап додаде и 12 скока и седум асистенции.
Оваа победа претставува 13-та во последните 15 натпревари за Лејкерс. Дончиќ беше силно поддржан од Остин Ривс, кој постигна 33 поени и забележа осум асистенции, и Деандре Ајтон со 22 поени и 12 скока. Леброн Џејмс не ја играше утакмицата поради болка во левото стапало, а оваа сезона одигра само четири натпревари поради повреда.
Во отсуство на Леброн, Дончиќ ја покажува својата најдобра форма досега. Тој моментално е лидер во НБА лигата со просечни 35 поени по натпревар и четвртиот асистент со 9,2 асистенции по натпревар. Оваа средба со Пеликанс беше негов шести последователен натпревар во кој постигна 30 или повеќе поени.
Лејкерс сега се на второто место во Западната конференција со сооднос од 15 победи и 4 порази.
Резултати:
Јута – Хјустон 101:129
/Бејли 19 – Шенгун 27/
Кливленд – Бостон 115:117
/Мобли 27 – Причард 42/
Филаделфија – Атланта 134:142 (115:115)
/Макси 44 – Џонсон 41/
Њујорк – Торонто 116:94
/Таунс 22 – Квикли 19/
Портланд – Окалхома 115:123
/Обадија 31 – Гилџес Александер 26/
Минесота – Сан Антонио 125:112
/Едвардс 32 – Фокс 25/
