Актуелниот шампион во Формула 1, Макс Ферстапен, оваа сезона вложи речиси еден милион евра за да го обезбеди своето учество. Основниот предуслов за сите натпреварувачи во Формула 1 е поседување на супер лиценца, која секако доаѓа со цена. За да учествува годинава, возачот на Ред Бул имаше трошок од 835.681 фунти, што изнесува околу 994.210 евра. Холандскиот шампион плаќа повеќе од двојно отколку најуспешниот Формула 1 возач, Луис Хамилтон, и дури 90 пати повеќе од новите возачи кои уште не се натпреварувале во Ф1. Хамилтон, на пример, за својата супер лиценца одвојува 512.912 евра, додека новајлиите како Кими Антонели, Габриел Бортолето, Џек Дуан и Исак Хаџар платиле по 11.141 евра. Оние кои возеле барем една трка во минатите сезони, како Оли Берман и Лиам Лосон, плаќаат повеќе – 26.892 евра и 20.141 евра соодветно. Цената на супер лиценцата за секој возач се пресметува врз основа на освоените бодови во претходната сезона. Основната сума за добивање на лиценцата се верува дека е износот кој го плаќаат дебитантите, каде што секој бод чини околу 2.250 евра. И, покрај тоа што супер лиценцата е неопходна за возачите, нејзината цена ја покриваат екипите. Минатогодишниот ривал на Ферстапен, Ландо Норис од Мекларен, издвои 825.675 евра за својата лиценца, додека неговиот колега Оскар Пјастри плати 668.167 евра. Шарл Леклер, од тимот на Ферари, исто така има обврска да плати 812.174 евра за своето учество. Новиот член на Вилијамс, Карлос Саинц Јуниор, го добива правото да се натпреварува по цена од 663.667 евра.
