Денес, во Фудбалската федерација на Македонија, официјално беа објавени сите детали околу ВАР-системот, кој за првпат во историјата на македонскиот фудбал ќе се применува во новата сезона на ПМФЛ, што започнува во петок.
Федерацијата информира дека ВАР просториите ќе бидат уредени согласно највисоките стандарди, и ќе бидат вкупно три, што ќе овозможи да се организираат три натпревари истовремено.
Претседателот на „куќата на фудбалот“, Масар Омерагиќ, по доаѓањето на функцијата, веднаш ја издвои ВАР-тематиката како своја приоритетна цел. И покрај скептицизмот на некои, денес Омерагиќ може со гордост да ја поздрави својата работа и посветеност на подобрувањето на фер-плејот во ПМФЛ, што дополнително ќе го унапреди фудбалот во земјава.
„Во последните три месеци постигнавме значителни резултати. На многу поголеми федерации од нашата им беа потребни и по една година, а можеби и повеќе, за да го имплементираат ВАР-системот. Затоа ФИФА и УЕФА ни изразија признание, бидејќи не им беше верувано дека за толку кратко време ќе успееме да реализираме овој амбициозен проект“, изјави Омерагиќ.
Фудбалската федерација, исто така, планира да имплементира и репортажно возило за потребите на преносите.
