„Во текот на оваа година можеби успеавме да воспоставиме чврсти основи за идните реформи. Оваа година е значајна многу повеќе од сите седум години кои ги помина претходната власт на СДСМ и ДУИ“, изјави пратеничката од ВМРО-ДПМНЕ, Ели Панова, на денешната трибина во Струмица под наслов „Градење темели за македонското земјоделство и храна“.
Панова продолжи:
„Во оваа година, ние добивме увид во буџетот со кој располагаме. Наследивме долгови и во првите 100 дена бевме фокусирани на справувањето со тие обврски. Морам да напоменам дека исплаќавме задоцнети плати во АД ‘Водостопанство’ и Македонски шуми, средства кои не беа предвидени во буџетот за 2024 година. Благодарение на напорите на Владата, успеавме да најдеме средства за тие плаќања, кои првично не беа правилно планирани“, нагласи Панова.
Таа истакна дека ребалансот на буџетот, кој повторно е предложен во Собранието, е клучен за функционирањето на македонскиот систем.
„Со ребалансот, кој повторно е во Собранието, се обезбедуваат и неисплатените субвенции. Тие мораа повторно да се обезбедат за да можеме да ги подмириме нашите долгови и за да сме сигурни дека нашите земјоделци ќе добиваат субвенции редовно, навремено и онака како што заслужуваат“, истакна Панова.
Панова ја потенцираше важноста на работата на Собранието во изминатата година, кое донело повеќе од 297 закони, што е значајно повеќе од половината од законите донесени за време на владеењето на СДСМ и ДУИ.
„Она што би сакала да нагласам е дека во последната година, Собранието успеа да донесе значителен број закони – над 297, што претставува повеќе од половината од законодавството за време на нивниот мандат. Иако дел од овие закони се однесуваат на усогласувања, многу од нив се фокусирани на поддршка на земјоделството и решавање на проблемите со кои се соочуваат македонските земјоделци“, заврши Панова.
