На прв поглед, програмата на Фејсбук, наречена „Да зборуваме грчки, чекор по чекор“, изгледа како позитивен потег од страна на грчката амбасада во Македонија, со цел да се поттикне добрососедството и да се надминат политичките стереотипи во македонско-грчките односи, што се истакаа дури и по Преспанскиот договор.
Овој чекор доби поддршка од Павле Воскопулос, член на Колективното раководство на Виножито – Европска слободна алијанса, кој во својот коментар на Фејсбук-страницата предложи двотомниот грчко-македонски и македонско-грчки речник, издаден од Виножито.
„Почитувани, по повод вашата последна иницијатива, сметаме дека употребата на соодветна литература може значително да го олесни реализирањето на вашиот проект.”
Виножито – Европска слободна алијанса во изминатите години го објави двотомниот Грчко-македонски и Македонско-грчки речник, кој е важно референтно дело за сите кои се интересираат за современиот македонски јазик.
Важно е да се спомене дека издавањето на речникот беше поддржано од средства добиени по одлука на Европскиот суд за човекови права, во врска со настаните од 1995 година и употребата на современиот македонски јазик на двојазичната табла пред просториите на партијата.
„Ако сметате дека е корисно, би ни било задоволство да ви го предадеме ова издание, како и нашето искуство, за да придонесеме кон оваа важна иницијатива, како во Скопје, така и пошироко,“ напиша Павле Воскопулос во својот коментар на страницата на Амбасадата на Грција во Македонија.
Секој напор за искрено добрососедство и комуникација во односите помеѓу Македонија и Грција заслужува поддршка, вклучувајќи ја и оваа иницијатива за учење на грчки јазик за македонските граѓани на Фејсбук. Во таа насока, би било корисно амбасадата да ги разгледа и користи речниците изготвени од Виножито за правилно разбирање и учење на грчкиот јазик.
Ј.П.
