Министерката за образование и наука, Весна Јаневска, потврди дека од 1 септември учебниците ќе бидат достапни.
„Сите можат да бидат мирни, не е ова прва година кога ќе имаме учебници. И минатата година, со напорна работа, успеавме да обезбедиме учебници за учениците. Дел од учебниците веќе се дистрибуираат во училиштата. Наставниците се на колективен одмор до 15-ти, а по тоа поголем интензитет ќе има во испораката на учебници. Во моментов, завршуваме некои процедури, но и тие ќе бидат комплетирани, така што учебници по секоја цена ќе има“, рече Јаневска во своето гостување на „Вести плус“ на Канал 5.
Што се однесува на учебникот по историја и дали ќе бидат прифатени препораките од Историската комисија, таа нагласи дека „ќе бидат спомнати сите важни историски личности какви што треба да бидат спомнати“.
„Оваа година воведуваме посебен предмет по историја, како и предмет по географија, и за двата ќе има учебници. Овие предмети се исклучително значајни и нашите деца мора да ги изучуваат. Мешаните комисии сè уште не доставиле официјален предлог до Министерството, па затоа немаме обврска да применуваме информации од јавноста без соодветен официјален допис. Сепак, ќе бидат спомнати сите важни историски личности распределени по различни теми и поглавја, согласно ставовите на нашите автори“, додаде таа.
Во врска со оштетените учебници од минатата година, Јаневска нагласи дека училиштата треба да ги пријават до Министерството, кое ќе испорача нови примероци спротивно на пријавениот број.
„Училиштата ги пријавуваат старите учебници што треба да бидат заменети. Колку учебници од секој предмет пријават, толкав број ќе испорачаме. Некои училишта понекогаш прават пропусти; таму треба да биде формирана комисија која ќе ги разгледа старите учебници и ќе утврди дали се оштетени или не. Законот предвидува дека родителите треба да платат 70% од вредноста на оштетените учебници. Некои општини, особено, не сакаат да ги побараат тие средства од родителите и затоа пријавуваат помал број на оштетени учебници. Ние годинава акцентиравме дека е неопходно да се пријават сите оштетени учебници и училиштата ќе добијат онолку учебници колку што побараат“, изјави Јаневска.
