Во текот на свечениот прием за кралот Чарлс и кралицата Камила во Вашингтон, поранешниот американски претседател Доналд Трамп привлекол внимание со своите необични коментари – од шеги на сметка на британскиот монарх до забелешки за сопругата Меланија. Државната посета на кралското семејство започнала со официјална церемонија на јужниот тревник на Белата куќа. Во својот говор, Трамп од темата за 250-годишното пријателство меѓу САД и Обединетото Кралство, прешал на лични анекдоти.
Тој се потсетил на својата мајка, Мери Ен Меклауд, и нејзиниот ентузијазам за покојната кралица Елизабета Втора.
Во помалку бизарен момент, Трамп се пошегувал дека неговата мајка била „заљубена“ во кралот Чарлс Трети додека тој бил млад принц, што предизвикало непријатна насмевка кај британскиот монарх. Трамп раскажал дека мајка му, гледајќи го младиот Чарлс на телевизија, често велела дека е „симпатичен“.
„Секогаш кога кралицата се појавуваше на некоја церемонија, мајка ми беше залепена за телевизорот и велеше: ‘Погледни, Доналде, колку е тоа убаво’“, истакнал Трамп. „Таа навистина ја сакаше таа фамилија, но се сеќавам и дека јасно рече: ‘Погледни го младиот Чарлс, толку е симпатичен.’ Беше заљубена во него. Можете ли да верувате? Се прашувам што би мислела сега“, додал тој. На оваа забелешка, кралот Чарлс се насмевнал и малку засрамено помахал со раката.
Мајката на Трамп, Мери Ен, родена е во 1912 година во Шкотска и емигрирала во Америка во 1930. година, а во 1942. станала државјанка. Во Њујорк го запознала претприемачот Фред Трамп, со кого била во брак 63 години и имале пет деца. Починала во август 2000. година на 88-годишна возраст.
Кога споменал долгогодишниот брак на своите родители, Трамп се обратил кон првата дама Меланија, која седела зад него заедно со кралицата Камила. „Тоа е рекорд што нема да можеме да го достигнеме, драга. Жал ми е, едноставно нема да оди така. Ќе ни биде добро, но не толку добро“, рекол тој, алудирајќи на разликата од 24 години меѓу него и неговата 56-годишна сопруга.
Опуштената шега на Трамп за возраста на сопругата дошла само еден ден по неговото барање ABC веднаш да го отпушти Џими Кимел, долгогодишен водител на вечерното шоу, по шега кажана во емисија. Кимел ја опишал првата дама како личност со „сјај на вдовица“, што било протолкувано како алузија на годините на Трамп.
По обидот за насилство на добротворна вечера, претседателот и првата дама ги осудиле коментарите на Кимел како поттикнување на атентат. Меланија Трамп на социјалната мрежа го обвинила Кимел за „говор на омраза и насилство“, нарекувајќи го „кукавица“. Трамп на својата платформа Truth Social изразил подлабока загриженост, обвинувајќи го Кимел дека повикува на неговата смрт.
„Џими Кимел треба веднаш да биде отпуштен од Дизни и ABC. Ви благодарам за вниманието!“, порача тој. И покрај неговото барање, ABC ја емитуваше емисијата на Кимел според планот.
