Новоизбраниот американски претседател Доналд Трамп му порача на украинскиот лидер Володимир Зеленски да започне да размислува за прекин на огнот и можноста за отстапување на територии кои моментално се под руска контрола, пренесува „Ел Паис“.
– Погледнете ги овие градови, нема згради во добра состојба. Значи, кога велите „обновете ја земјата“, што изградете? Ова е проект за реконструкција што ќе трае 110 години – изјави Трамп од неговиот голф клуб во Флорида.
Трамп, кој претходно вети дека ќе стави крај на конфликтот во Украина во рок од еден ден по преземањето на функцијата, допрва треба да открие како планира да го постигне тоа. Овој месец тој ги повика Украина и Русија да постигнат итен прекин на огнот.
Во исто време, рускиот претседател Владимир Путин, говорејќи на прес-конференција на 19 декември, повтори дека Москва останува отворена за преговори со Киев, но без никакви предуслови, освен оние договорени во Истанбул во 2022 година.
Путин потсети дека преговорите треба да вклучуваат неутрален и неврзан статус на Украина и ограничувања за распоредување на странско оружје, истакнувајќи дека разговорите мора да ја земат предвид новата реалност на теренот.
