Јапонскиот автомобилски гигант Тојота сериозно размислува за целосно враќање во Формула 1, открива тркачкиот директор на компанијата, Масаја Каџи, во интервју за „Аутоспорт“.
Тојота имаше сопствен фабрички тим во шампионатот од 2002 до 2009 година, но не успеа да обезбеди значајни успеси. Нивното учество често се смета за еден од најскапите неуспеси во историјата на Формула 1, бидејќи во повеќето сезони имаа еден од најголемите буџети на стартната линија.
Поради глобалната финансиска криза, Тојота се повлече во 2009 година и го пренасочи фокусот кон трките на издржливост и рели, каде што постигна големи успеси. Сепак, од минатата сезона, тимот „Тојота Газу Рејсинг“ почна да соработува со американскиот тим Хаас, чие партнерство резултираше со видливо присуство на логото на јапонскиот бренд на нивните болиди.
Иако првично оваа соработка беше опишана како технолошко партнерство без планови за целосно враќање,сега работите се менуваат.Тојота активно ја разгледува можноста да влезе во Формула 1 со сопствен мотор, а можеби дури и како целосен тим во иднина.
„Ги проучуваме технологиите за 2026 година, како и тековните. Се движиме постепено во таа насока, но сè уште немаме донесено конечна одлука. Не е сигурно што ќе се случи по 2030 година. Работиме на многу различни нови технологии и ќе видиме дали нашите развојни цели ќе се совпаднат со визијата на Формула 1. Ако имаме свој тим, ќе можеме сами да ги избираме возачите, што ќе ни овозможи полесно да внесеме наши таленти во спортот. Но, мора внимателно да процениме колку ресурси ќе бидат потребни за ова да стане реалност“, изјави Каџи.
Покрај ова, Формула 1 наскоро ќе влезе во нова ера со регулативите за 2026 година, кои ќе донесат револуционерни промени во моторите и аеродинамиката. Ова претставува дополнителен фактор кој може да ја поттикне Тојота да донесе конечна одлука за своето враќање во спортот.
