Адвокатот за случајот на Александар Ѓорчевски: Жалбата е неоснована
Адвокатот Владимир Туфегџиќ пред Апелациониот суд изрази став дека жалбата поднесена од Обвинителството против ослободителната пресуда за Александар Ѓорчевски е неприфатлива. Тој истакна дека тврдењето на обвинителството дека е логично да не постојат докази за комуникација помеѓу обвинетиот и останатите членови на групата, која е осомничена за убиствата на Вања Ѓорчевска и Панче Жежовски, претставува “опасен преседан”.
„Жалбата е неоснована; првостепениот суд донесе праведна одлука, особено поради тоа што јавниот обвинител јасно и недвосмислено потврди дека нема докази против Александар“, изјави Туфегџиќ.
Тој додава дека и покрај тоа, обвинителството продолжува да се фокусира на објаснувањето за недостатокот на докази, наместо да презентира конкретни докази за вината на клиентот.
„На обвинителството му недостасува основа за тврдење дека е нормално да нема докази. Фактот дека не постои ниеден доказ за комуникација меѓу Александар и другите осомничени, и во првиот неуспешен обид за грабнување, и во вториот успешен, значи дека Апелациониот суд треба да ја потврди ослободителната пресуда“, нагласи тој.
Адвокатот потсети дека случајот бил разгледуван и пред Врховниот суд, и дека ако постоеше дури и минимален доказ за учество на Александар Ѓорчевски во настаните, настаните и пресудата би биле значително поинакви. „Ако барем малку укажуваше на неговата инволвираност во оваа стравична случка, убеден сум дека исходот би бил различен“, рече Туфегџиќ.
На рочиштето, Александар Ѓорчевски се обрати со кратка изјава: „Како заложник во оваа ситуација, немам што да додадам“, по што ја напушти судницата.
Претходно, вишиот обвинител Дарко Јакимовски побара укинување на ослободителната пресуда, тврдејќи дека судот не направил соодветна анализа на доказите и не утврдил дали Ѓорчевски имал поврзаност со делата. Обвинителството веруваше дека Александар играл „клучна улога“ во овој случај и укажа на неговото однесување пред и по грабнувањето на Вања, како и на комуникацијата со семејството.
