Премиера на документарецот „Руини“ на меѓународен филмски фестивал

Дебитантскиот долгометражен документарен филм „Руини“, во режија на визуелната уметница Елена Чемерска, ќе ја има својата светска премиера на Шангајскиот меѓународен филмски фестивал, кој важи за еден од најзначајните филмски настани. Филмот е селектиран за натпреварувачката програма и ќе биде прикажан на 14 јуни 2026 година.

„Руини“ е резултат на долготраен проект наречен „Татковина: Споменик на слободата“ и го документира враќањето на режисерката во Македонија, каде таа учествува во процесот на реставрација на Споменикот на слободата во Кочани, дело на нејзиниот татко, уметникот Глигор Чемерски, и архитектот Радован Раѓеновиќ.

Филмот, преку архивски материјали, лични сеќавања и сегашноста на споменикот, ги истражува пресликувањата на колективната и личната загуба, поставувајќи прашања за тоа што може да се обнови, а што не.

Проектот „Татковина: Споменик на слободата“, кој беше инициран од Чемерска во 2017 година, обедини повеќе меѓународни партнери, вклучувајќи уметници, културни работници и експерти од областа на конзервацијата и реставрацијата, со цел физичка и значејна ревитализација на споменикот. Проектот доби грант од Фондот за културно зачувување на американските амбасадори и во соработка со Општина Кочани, што овозможи целосна реставрација на споменикот и мозаиците во 2024 година.

Додека „Татковина“ се фокусира на физичката и општествената ревитализација на локалитетот, „Руини“ е интимна филмска анализа за односот помеѓу концептот на колективна слобода вградена во споменикот и искуството на личната загуба, како и приказна за трансформацијата низ времето и отсуството.

Филмот е остварен со поддршка од Агенцијата за филм на Република Македонија, Хрватскиот аудиовизуелен центар, РТВ Словенија и проектот „Култура за развој“ на Владата на Швајцарија, реализиран од Хартефакт Фонд.

„Руини“ е копродукција помеѓу Синема Футура и Минимал колектив од Македонија, Рестарт од Хрватска и Потем од Словенија, во соработка со Filmtrick. Продуценти се Иван Унковски, Ивана Шекуткоска и Елена Чемерска, а копродуценти Оливер Сертиќ и Ивана Нацева.

Кинематографијата е дело на Ѓорѓи Клинчаров и Марина Колоска, монтажата на Владимир Гојун и Горјан Атанасов, а композитор е Игор Василев Новоградска, со дизајнер на звук Лука Гамулин.