Стјуардесата Вања Виќентијевиќ (32) од Белград е меѓу тројцата тешко повредени патници во авионската несреќа што се случи при слетувањето на авионот на компанијата „Делта ерлајнс“ на меѓународниот аеродром Пирсон во Торонто, Канада.
Семејството на Вања стапило во контакт со српскиот медиум „Блиц“, изразувајќи загриженост за нејзината состојба.Според кажувањата на нејзината роднина Мирјана Дориќ, Вања била на должност како стјуардеса на летот 4819 кога при слетувањето дошло до несреќата. Во моментот на превртување, едно од нејзините ребра ѝ ја пробило белодробната марамица, поради што таа се наоѓа во критична состојба и не е свесна.
Семејството добило информации од болницата дека нејзината состојба е многу тешка и дека лекарите се борат за нејзиниот живот. Иако било побарано некој од роднините да дојде, посетите се забранети, а семејството останува немоќно во оваа ситуација, надевајќи се на позитивен исход.
Во меѓувреме, според најновите податоци, вкупно 18 лица се повредени во оваа авионска несреќа, при што тројца од нив се во тешка состојба. Меѓу нив е и едно дете кое веднаш било пренесено во детската болница во Торонто.Иако сите 80 патници во авионот ја преживеале несреќата,дел од нив останале заглавени внатре во леталото кое по инцидентот останало превртено на пистата.
Канадските власти ја преземаат истрагата за причините кои довеле до оваа несреќа, но засега нема официјални соопштенија за тоа што точно се случило. Во јавноста се појавија и нови снимки од моментот на превртувањето на авионот, кои јасно го покажуваат инцидентот од различни агли.
