Претседателката Гордана Сиљановска-Давкова ја прими Мириам Лексман, пратеничка во Европскиот парламент од Словачка, која припаѓа на Европската Народна Партија. На средбата се дискутираше за европската интеграција на нашата земја. Претседателката нагласи дека членството во Европската Унија останува наш стратешки приоритет, и покрај актуелната блокада на процесот.
Сиљановска-Давкова истакна дека пристапниот процес мора да се заснова на заслуги, согласно исполнувањето на Копенхашките критериуми, без да бидат поставени билатерални услови. Таа смета дека блокадата претставува сериозна пречка и опасен преседан кој може да биде злоупотребен во иднина, загрозувајќи не само процесот на проширување, туку и безбедноста во регионот.
Претседателката, потсетувајќи дека нашата земја е 100% усогласена со заедничката надворешна и безбедносна политика на Европската Унија, нагласи дека во времиња на сложени геополитички предизвици, интеграцијата на земјите од Западниот Балкан во Унијата е најефикасниот начин за зајакнување на отпорноста против влијанија од трети страни. За неа, ЕУ е природно политичко семејство за сите земји од регионот, имајќи предвид нивната географска, историска и културна поврзаност.
На крајот, соговорничките се согласија за важноста на натамошната соработка и ангажманот на членките на ЕУ, вклучително и Словачка, за надминување на опструкцијата при македонското пристапување кон Европската Унија.
