Српскиот министер за надворешни работи, Марко Ѓуриќ, при посетата на Москва изјави дека Србија има намера да даде свој придонес во решавањето на конфликтот во Украина и е подготвена да преземе улога на домаќин на можни преговори, јавува „Анадолија“.
„Кога станува збор за нашата определба да помогнеме во изнаоѓање решение за тековната криза во Украина, иако Србија можеби нема големи геополитички капацитети во однос на бројноста на населението, нашата подготвеност и желба да учествуваме во ставање крај на овој конфликт е голема. Секогаш сме спремни да организираме и формални и неформални разговори“, изјави Ѓуриќ.
Овие негови зборови беа изнесени за време на заедничката прес-конференција што ја одржа по состанокот со рускиот министер за надворешни работи Сергеј Лавров.
Новинарите прашуваа дали за време на средбата биле разгледувани можностите за вклучување на Белград во дијалогот за прекин на непријателствата во Украина.Оваа иницијатива произлегува од фактот што Србија е една од ретките земји која одржува добри односи со Вашингтон, Москва и Киев, што ја прави потенцијален медијатор во преговорите.
