Системот за интегрирано планирање на ресурсите (ИПР) бил оставен без одржување две години, но од јануари годинава започна интензивна работа на неговото подобрување. Внимателно ги следиме препораките од Државниот завод за ревизија и, согласно со нив, се надеваме на одлични резултати. Со новиот систем ќе добиеме доверлив инструмент, достапен не само за нашите служби, туку и за институции надвор од Службата за општи и заеднички работи (СОЗР), како што се агенции и општини, кои досега работеа со хартиени документи, рече министерот за дигитална трансформација, Стефан Андоновски.
Според Андоновски, системот веќе функционира, а модулите ќе бидат објавувани во јавноста по нивното развивање.
„Излезе извештајот од Државниот завод за ревизија. За жал, системот две години не беше одржуван. Со потпишувањето на договорот во јануари, започнавме сериозен план за справување со идентификуваните недостатоци. Извршени се и безбедносни тестови за заштита на корисниците и податоците, а во моментов се тестираат официјалните службени е-mail адреси на корисниците. По завршувањето на оваа фаза, ќе добиеме систем на кој можеме да му веруваме. Овој систем ќе биде достапен за агенции, општини и исто така за сите институции кои сè уште работат на хартија“, истакна Андоновски, одговарајќи на новинарско прашање по активирањето на новата канцеларија за административни услуги во општината „ЕТУ Свети Николе“.
Тој најави и поврзување на системот со трезорското работење.
„Тестирањето го реализиравме оваа недела во нашето Министерство. Веќе не е неопходно да се ангажираат сметководители од СОЗР, бидејќи нашите вработени во Секторот за финансии сами извршуваат пресметки. Во следната фаза, би сакал секоја институција и министерство самостојно да ги обработуваат пресметките. Се надевам дека со развојот на новите модули уште повеќе ќе ја оптимизираме работата на системот“, добави Андоновски.
Државниот завод за ревизија во својот последен извештај, објавен завчера, констатира дека системот не е одржуван, и дека не постои навремено и целосно дигитално следење на сметководствено-финансиските услуги во 40 државни институции, вклучувајќи десет министерства, преку кои минуваат речиси 19 проценти од државниот буџет.
