Претседателката Гордана Сиљановска-Давкова денеска во вилата „Билјана“ во Охрид имаше чест да ги прими уметниците кои утревечер ќе го отворат 65. издание на фестивалот „Охридско лето“. Меѓу присутните беа американската пијанистка Клер Хуангчи и диригентот Едвин Аутвотер, како и танчерите Клаудија Ракел Да Силва Мартинс и Рафаел Португуеса. Тие беа во придружба на директорот на фестивалот, Ѓорѓи Цуцковски, и селекторите Симона Ѓорчева и Ненад Витанов.
Според информациите од Кабинетот на претседателката, фестивалските претставници ја запознаа со програмската содржина на 65. Охридско лето, истакнувајќи ја нејзината разновидност и висок квалитет.
„Охридско лето веќе шест и пол децении ги обединува музиката, театарот и уметноста“, подвлекла претседателката, додавајќи дека „секој изведувач создава уникатна приказна во историјата на фестивалот“.
Гостите од Соединетите Американски Држави и Португалија, покрај благодарноста за можноста да учествуваат во овој реномиран настан, изразија и свое воодушевување од убавините на Охрид.
