Во последните неколку часа, шест држави испуштија 136 пакети хуманитарна помош во форма на храна за населението од северниот и јужниот дел на Појасот Газа, како што јавија израелските одбранбени сили (ИДФ).
Во соработка со Израел, Обединетите Арапски Емирати, Јордан, Египет, Франција, Германија и Белгија организираа воздушни испуштања, коишто ги водеше израелската агенција за координација на палестинските територии, ЦОГАТ.
Според ИДФ, овие активности се продолжение на сеопфатните напори за подобрување на хуманитарната ситуација во Појасот Газа, извести ДПА.
Германските вооружени сили испратија два транспортни авиони А400М, кои носеа 44 палети со храна, медицински материјали и друга помош, со вкупна тежина од околу 19 тони, а портпаролот на воздухопловните сили ја потврди информацијата за ДПА во Берлин.
Планирано е ново испуштање на помош за почетокот на следната недела.
Според Обединетите нации, Појасот Газа е на работ на глад. Израел го контролира пристапот до крајбрежната територија на Медитеранот и со месеци дозволува само минимални или никакви испораки на помош.
Израел укажува дека оваа стратегија е насочена кон создавање притисок врз исламистичката група Хамас да ги ослободи заложниците киднапирани на 7 октомври 2023 година.
Од минатиот викенд, по зголемените глобални критики за тешката состојба на палестинското цивилно население, Израел дозволува поголеми испораки преку копнени рути и ги поддржува воздушните операции за испуштање помош од сојузниците.
