Здружението Македонски Национален Комитет при Меѓународниот Совет на Музеите (МНК ИКОМ) организира семинар во Музејот на македонската борба за самостојност во Скопје, фокусиран на темата „Едукација и инклузија – клучна карика во музејското работење“. Целта на оваа иницијатива, според МНК ИКОМ, е да се развиваат методи и да се нагласува значењето на учењето во музејскиот контекст за различни групи на посетители. Преку спроведување на образовни работилници за деца, ученици, студенти и постари лица, се настојува да се истражи интересот на публиката и да ѝ се одговори на потребите. Овие проекти, планови и едукативни изложби се едната страна на патот кон повишување на јавната свест за правата и интеграцијата на лицата со инвалидитет, нешто на што музејот како институција активно работи.
Целта е да се реализираат повеќе проекти кои ќе ја зголемат пристапноста на музејските поставки за луѓето со различни способности. Планирани се и обуки и предавања во соработка со наставници, колеги и партнерски организации, се истакнува од МНК ИКОМ. На семинарот своите научни трудови ќе ги презентираат неколку автори: Марија Димишкова ќе зборува за „Музеј за сите (неформално образование)“, Маја Димитрова ќе се осврне на „Социјална инклузија“, Ана Вишинова ќе ги разгледа темите околу „Музејска едукација и пристапност кон различни целни групи“, додека Перо Арџанлиев ќе се фокусира на „Ракување, пакување и презентација на археолошки артефакти“.
