Соединетите Американски Држави значително го зголемија своето воено присуство во близина на Блискиот Исток, подготвувајќи се за можеби директно вклучување во конфликтот меѓу Израел и Иран, известува Скај њуз.
Според податоците за следење на летовите, во периодот од понеделник до четврток, забележани се најмалку 52 американски воени авиони кои летаат над источниот Медитеран во правец на Блискиот Исток.
Од тие авиони, 25 слетаа на грчкиот остров Крит, што е осумкратен пораст во споредба со почетокот на месецот.
Од вкупниот број авиони, 32 се користеле за транспорт на војници и опрема, 18 за полнење гориво во воздухот, а два биле извидувачки.
Важно е да се напомене дека овие податоци не вклучуваат борбени авиони, чии летови се изведуваат без да се објавува нивната локација.
Меѓутоа, Скај њуз истакнува дека 12 ловци Ф-35 биле забележани како летаат од Велика Британија кон Блискиот Исток.
Во исто време, се бележи значително зголемување на американскиот воен сообраќај и во Велика Британија.
Три клучни воени бази на Островот регистрирале 63 слетувања на американски воени авиони помеѓу 16 и 19 јуни, што е двојно повеќе од претходните недели.
Транспортните авиони C-17 Globemaster III и C-130 Hercules слетаа на аеродромот Прествик во Глазгов во четвртокот.
Стручњакот за безбедност, Форбс Мекензи, укажа на тоа дека ова распоредување означува „системско зголемување на воените капацитети“ во регионот, какво што досега не било забележано.
