Соединетите Американски Држави до Обединетите нации испратија нацрт-резолуција во која се бара од Иран да обезбеди целосни информации за своите нуклеарни инсталации и залихи на збогатен ураниум, а исто така и да овозможи итен пристап за инспекторите на Меѓународната агенција за атомска енергија (МААЕ). Според извори на агенцијата Ројтерс, која имала увид во документот, во предлогот се нагласува дека Иран е должен да достави прецизни податоци за нуклеарниот материјал и за заштитените нуклеарни објекти на неговата територија. Во резолуцијата се бара и Техеран без одлагање да ѝ овозможи на МААЕ пристап потребен за проверка на сите доставени информации.
Во меѓувреме, заменик-министерот за надворешни работи на Иран, Казем Гарибабади, ја обвини МААЕ за политизација на контролата врз иранската нуклеарна програма. Тој истакна дека агенцијата не реагира соодветно на американските и израелските напади врз иранските нуклеарни инфраструктури и го критикуваше генералниот директор на МААЕ, Рафаел Гроси, за неговиот пристап кон оваа ситуација. Новата иницијатива од Вашингтон доаѓа во период на зголемени тензии околу иранската нуклеарна програма и интензивирани меѓународни напори за поголем надзор на нуклеарните активности во Техеран.
