Русија се стреми да го ограничи големиот прилив на кинески автомобили, што создава значителни предизвици за кинеските производители и трговци кои главно се насочени кон извоз за оваа земја. Податоците од Кинеската асоцијација за патнички автомобили (CPCA) покажуваат дека извозот на кинески возила во Русија претходната година бил дури седумкратно зголемен во однос на 2022 година. Овој пораст е директна последица на санкциите од западните земји што се наметнати на Русија поради војната во Украина, кои резултираа со намалена достапност на европски и американски автомобилски брендови, според Financial Times. Покрај тоа, кинеските производители го пренасочија фокусот кон рускиот пазар, тргнувајќи од тоа што антидампинг мерките го ограничија нивниот извоз на пазарите во САД, ЕУ, Канада, Турција и Бразил. Куи Донгшу, генералниот секретар на CPCA, вели дека „меѓународните брендови во Русија се веќе комплетно заменети со кинески автомобили“. Меѓутоа, тој исто така истакнува дека завршувањето на конфликтот меѓу Русија и Украина би можело значително да го зголеми предизвикот за кинеските производители.
Во текот на 2023 година, Русија купила над еден милион кинески возила, што е околу 30 проценти од целиот кинески извоз на бензински автомобили. Сега кинеските марки држат 63 проценти на рускиот автомобилски пазар, додека уделот на домашните руски производители се намали на 29 проценти. Од страна на руските власти се преземаат мерки за ограничување на увозот. Во јануари, таканаречените „такси за рециклирање“, кои дејствуваат како форма на царина, беа значително зголемени на 667.000 рубли (околу 7.500 долари) по патничко возило, што беше повеќе од двојно од износот во септември минатата година. Планирано е овие такси да продолжат да растат за 10 до 20 отсто годишно до 2030 година. Освен покачувањето на даноците, руските власти неодамна објавија дека три големи кинески производители на камиони не ги исполнуваат безбедносните стандарди, поради што продажбата на еден модел е забранета во земјата. Планирани се уште повеќе тестирања и проверки за увезени возила. Кинеските производители исто така го искористуваат рускиот пазар за извоз на постари возила, главно бензински, бидејќи во Кина расте популарноста на електричните автомобили. Бензинските автомобили минатата година учествувале со импресивни 97 проценти од извозот во Русија.
