Американскиот државен секретар Марко Рубио го оцени извештајот од пет европски сојузници, во кој Русија се обвинува за убиството на покојниот критичар на Кремљ, Алексеј Навални, со токсин добиен од отровни жаби, како „вознемирувачки“. Рубио исто така изјави дека Вашингтон нема основа да ја оспорува таа проценка.
На прес-конференција во Братислава, за време на неговата посета на Словачка, Рубио нагласи дека САД се запознаени со извештајот и немаат причина да го оспоруваат. „Свесни сме за извештајот. Тој е навистина вознемирувачки. Имаме целосна свест за случајот со господинот Навални и нема причина да го доведуваме во прашање“, рече Рубио.
Во заедничка изјава, Велика Британија, Франција, Германија, Шведска и Холандија соопштија дека анализата на примероците од телото на Навални потврдиле присуство на епибатидин – токсин што се наоѓа кај одредени видови отровни жаби во Еквадор и кој вообичаено не се среќава во Русија.
Руската Влада, која претходно негираше каква било одговорност за смртта на Навални во арктичката казнена колонија во февруари 2024 година, ги отфрли најновите обвинувања, истакнувајќи ги како „западна пропагандна измама“, според руската државна новинска агенција ТАСС.
Кога беше прашан зошто САД не се приклучиле на заедничката изјава, Рубио одговори дека европските земји самостојно дошле до таквиот заклучок врз основа на сопствени разузнавачки информации. „Тие земји го направија тоа во координација. Ние донесовме наша одлука, но тоа не значи дека не се согласуваме со исходот. Понекогаш одредени земји дејствуваат врз основа на податоците што ги поседуваат“, додаде тој.
Навални почина во затворот во Арктикот во февруари 2024 година, откако беше осуден за екстремизам и се соочи со повеќе обвиненија кои ги негираше. Неговата смрт предизвика остри реакции во меѓународната заедница и дополнително ги заостри односите меѓу Москва и западните држави.
