Државниот секретар на САД, Марко Рубио, и францускиот министер за надворешни работи, Жан-Ноел Баро, остварија телефонски разговор во врска со мировниот договор меѓу Ерменија и Азербејџан, како и за други значајни меѓународни прашања. Ова го објави ерменска новинска агенција.
„Двајцата го истакнаа својот ангажман за спречување на Иран во развивањето или стекнувањето на нуклеарно оружје. Во разговорот се адресираа и хуманитарната криза во Газа, напорите за постигнување прекин на огнот, завршувањето на конфликтот во Украина, како и обезбедувањето одржлив мир помеѓу Ерменија и Азербејџан, и ситуацијата во Судан“, соопшти американскиот Стејт департмент.
Овој телефонски повик се одржа во услови на непотврдени информации дека американскиот претседател Доналд Трамп работи на организирање на средба со лидерите на Ерменија и Азербејџан во Вашингтон оваа недела. Засега, нема официјални коментари од страна на Ереван во врска со оваа тема.
