Претседателот на Собранието, Африм Гаши, денеска се очекува да ги објави локалните избори. Оваа година се движиме кон осмите локални избори по прогласувањето на независноста на нашата држава.
Со распишувањето на изборите, започнуваат роковите за изборниот процес. Локалните избори ќе се одржат на 19 октомври, а вториот изборен круг е планиран за 2 ноември. Граѓаните ќе избираат градоначалници и советници во 80 општини, вклучувајќи го и Градот Скопје.
Рокот за поднесување на кандидатски листи е најдоцна 35 дена пред изборниот ден, што значи дека подносителите треба да ги достават листите со кандидати за советници и градоначалници до 15 септември.
Државната изборна комисија ќе има неколку дена за проверка и утврдување на листите, со конечен рок до 27 септември. Изборната кампања ќе биде активна 20 дена, со почеток на 30 септември.
Буџетот за одржување на локалните избори во 2025 година, кој е веќе соопштен, изнесува 9.760.000 евра. Од таа сума, две третини се наменети за медиумите и платената политичка реклама. Дополнително, средствата ќе бидат искористени за надоместоци на членовите на избирачките одбори, како и за транспорт и дистрибуција на избирачкиот материјал.
Еден од клучните рокови е периодот за увид во Избирачкиот список, кој започнува 15 дена по расписувањето на изборите и трае дваесет дена. Во овој период, избирачите кои имаат право на глас, односно оние кои навршиле 18 години, ќе можат да ги проверат своите податоци и, доколку имаат забелешки, да побараат корекции до ДИК, било електронски или преку подрачните канцеларии. Имено, актуелизирањето на Избирачкиот список ќе биде извършено по распишувањето на изборите.
Според важењето на Изборниот законик, локалните избори се одржуваат на секои четири години во втората половина на октомври. Локалната самоуправа е организирана во 80 општини и Градот Скопје, каде што функционираат 10 општини со поделени надлежности. Изборите се одржуваат најрано 70, а најдоцна 90 дена по распишувањето.
Локалните избори во Македонија се одржувале во 1996, 2000, 2005, 2009, 2013, 2017 и 2021 година.
