Утре во Апелациониот суд во Скопје ќе се одржи јавно сослушување во врска со жалбите на Љупчо Палевски, Велибор Манев, Боре Видевски и Влатко Кешишев. Тие се осудени на доживотен затвор за киднапирањата и бруталните убиства на Вања Ѓорчевска и Панче Жежовски. Четворицата сакаат да биде укината првостепената пресуда и да се повтори судската постапка пред Кривичниот суд. Обвинителството исто така поднесе жалба, но во однос на ослободителната пресуда за Александар Ѓорчевски, таткото на Вања. Судija-известител е Лирие Елези-Ајрулау. Според првостепената пресуда, обвинетите добија 10 години затвор за киднапирањата и доживотен затвор за убиствата. Судот констатираше дека делата биле извршени согласно план и со намера за изнудување на финансиски средства.
