Главните преговарачи од Србија и Косово ја одржаа новата рунда на разговори во Брисел, под покровителство на специјалниот претставник на Европската унија, Петер Соренсен. Тој истакна дека е постигната согласност за продолжување на дијалогот во блиска иднина.
„Вчера имав долга средба со преговарачите од Белград и Приштина. Разговаравме за напредокот, нерешените прашања и подготовките за следната средба на високо ниво“, објави Соренсен на социјалната платформа Икс.
Белград бара основање на Заедница на општини со мнозинско српско население во Косово, што е обврска од спогодбата во 2013 година. Косовската страна, пак, тврди дека Србија ја блокира имплементацијата на интегрирано гранично управување.
Преговарачот од Србија, Петар Петковиќ, потврди дека е поднесен план за намалување на тензиите во северниот дел на Косово и најави дека разговорите ќе продолжат во јули. На 26-ти јуни во Женева е предвиден состанок на работната група за исчезнати лица од војната во Косово.
Косовскиот претставник, Бесник Бислими, нагласи дека Соренсен има „јасна визија за дијалогот“, но исто така додаде дека е „прерано за конкретни резултати“.
