Израелскиот премиер Бенјамин Нетанјаху изјави дека исходот од конфликтот со Иран отвора нови можности за мир, што Израел не смее да ги пропушти.
„Оваа победа ни нуди шанса за значително проширување на мирните договори. Работиме на тоа со огромен ентузијазам“, истакна Нетанјаху. „Покрај ослободувањето на заложниците и уништувањето на Хамас, постои можност која не смееме да ја пропуштиме. Не можеме да изгубиме ниту еден ден“, додаде тој.
Според информации од весникот „Израел Хајом“, повикувајќи се на неименуван извор, Нетанјаху и американскиот претседател Доналд Трамп во телефонски разговор оваа недела разговарале за итно запирање на војната во Газа, можеби во наредните две недели. Весникот известува дека договорот може да вклучува проширување на „Абрахамските спогодби“ со соседите на Израел, вклучително Саудиска Арабија и Сирија.
Канцеларијата на Нетанјаху не се произнесе во однос на овие тврдења.
Примирјето меѓу Израел и Иран, објавено од Трамп, разбуди надежи кај Палестинците за завршување на војната во Газа, која трае повеќе од 20 месеци.
Во неделата, Нетанјаху изрази уверување дека со ослабувањето на Иран, повеќе земји ќе се приклучат на „Абрахамските спогодби“. „Ја скршивме оската“, изјави тој пред медиумите. „Ова е значајна промена, а статусот на Израел се зголемува, не само на Блискиот Исток, туку и на глобално ниво. Ова е вистинско поместување на тектонските плочи.“
Нетанјаху изрази надеж за „ново светло на иднината – исполнета со безбедност, просперитет, надеж и мир“.
