Наслов: Камион со дрва ја проби полициската контрола во Арачиново и побегна
Во недела, околу 12 часот, на влезот во скопското село Арачиново, полицајци му дале знак за запирање на товарно возило натоварено со дрва. Возачот не застанал и продолжил да вози.
Според првичните информации, тој го насочил камионот кон полицајците и нивното службено возило, па полицијата испукала предупредувачки истрели во воздух. Потоа возачот ги истоварил дрвата на улица и со возилото се дал во бегство.
Нема повредени лица. Запленетата дрвна маса е предадена на Шумска полиција, а се преземаат мерки за пронаоѓање на возачот и возилото.
